No decurso do acto no que recibiu o Premio de Xornalismo Xosé Aurelio Carracedo, o director de Tempos Novos e Tempos Dixital, Luís Álvarez Pousa, asegurou que “a función social e política dos medios, do xornalismo e dos xornalistas pasa polo momento máis crítico dos últimos cincuenta anos”. E urxiu un camiño de volta, que só será posible segundo afirmou nunha confluencia entre vontade política, toma de conciencia social, revalidación do xornalismo como profesión e practicándoo como “un contrapoder ao servizo da verdade”. Na súa resposta, o presidente da institución convocante, Luís Menor, refrendou como “imprescindible” o reivindicado papel mediador dos xornalistas, aos que “os políticos debemos respectar -dixo- para sermos respectados”.