Literatura, substantivo feminino
As mulleres están a ocupar os lugares máis destacados do panorama literario galego procurando un avance por vieiros que elas están a marcar con claridade para fuxir dun sistema anquilosado e caduco que semella a punto de estourar. Por iso non debe sorprender que sexan elas as que protagonicen case en exclusiva esta breve recensión sobre algunhas das publicacións máis interesantes dos últimos meses.
Unha saúde vizosa e un mercado irregular
A presenza dalgúns dos nomes máis relevantes do panorama literario galego no mercado editorial fan pensar que a saúde das nosas letras segue vizosa. Porén, esta situación non ten reflexo nin na súa difusión nin na súa debilitada implantación social. Unha mágoa que tanto esforzo e tan ben feito sexa pasto dun mercado irregular e impredicible. Botemos unha ollada.
As librarías enchéronse nos últimos meses de novidades que agoiran un verán de interesantes lecturas. Conflúen ademais nos andeis algúns dos nomes máis importantes do universo literario galego contemporáneo.
