Nos últimos meses, algunhas das propostas máis interesantes do panorama literario galego chegaron a nós avaladas por distintos premios e galardóns. Por máis que tal afirmación semelle ter unha lóxica incuestionable, o certo é que non sempre foi así. Non moito tempo atrás, ese aval deixara de ser unha garantía fiable de calidade por mor dalgunhas decisións que non imos entrar a valorar nestas liñas pero que, de certo, tiveron resultados, cando menos, desconcertantes. Esta volta á normalidade resulta gratificante para o usuario que, deste xeito, volve a dispoñer dunha pequena guía sobre a que orientar as súas lecturas.